Léttur 2003

Vorönn hófst 14. janúar. Byrjað var að æfa fyrir 10 ára afmælistónleika Kvennakórs Reykjavíkur en þar syngur Léttsveitin þrjú lög.

Léttsveitarkonur eru núna 112 talsins.

 


 

Léttsveitin söng á 10 ára afmælistónleikum Kvennakórs Reykjavíkur laugardaginn 25. janúar. Lögin sem við sungum voru Krummi, Kukkani lumen alla og I´m a Woman. Auk Léttsveitarinnar sungu á þessum tónleikum Kvennakór Reykjavíkur auðvitað, Gospelsystur Reykjavíkur og Vox Femine, þ.e. þeir kórar sem störfuðu fyrst undir merkjum Kvennakórsins. Skemmtilegir og vel skipulagðir tónleikar. Meðal gesta voru forseti Íslands, Ólafur Ragnar Grímsson, og borgarstjórinn í Reykjavík, Ingibjörg Sólrún Gísladóttir.


 

 

Árshátíðin 2003

Árshátíð Léttsveitarinnar var haldin föstudaginn 7. febrúar 2003 í Fóstbræðraheimilinu. Aldrei hefur mætingin verið jafngóð. Stórum hluta Léttsveitarinnar var boðið heim til Friðgerðar fyrir árshátíðina og var það mjög skemmtilegt. Veislustjóri var okkar frábæra Aðalheiður Þorsteinsdóttir. Þema árshatíðarinnar voru Vestmannaeyjar í tilefni af væntanlegri ferð til Eyja í vor. Skemmtiatriði komu úr ýmsum áttum. Vinur Öllu úr Schola Cantorum söng, Anna Valdís Kro, ein Léttsveitarkvenna, sýndi mikið þor og söng einsöng, nokkrir félagar úr Fóstbræðrum sungu nokkur lög við mikinn fögnuð, Blúsbræður, vinir Jóhönnu, léku nokkur lög, skemmtinefndin var með söngatriði og frábær kvikmynd úr ferli Léttsveitarinnar var frumsýnd. Fyrir dansi léku svo nokkrir Eyjapeyjar, vinir Bimbu. Allir skemmtu sér konunglega og er þessi árshátið enn ein rósin í hnappagat okkar frábæru skemmtinefndar.

 

Léttsveitin syngur í Smáralind - Mynd úr Fólk og Fréttir, Kópavogur

Léttsveitin hélt kökubasar og söng í Smáralind laugardaginn 8. mars. Mikil og góð sala var í kökunum. Allur ágóði af sölunni rennur í ferðasjóð, en Léttsveitin fer til Vestmannaeyja og heldur tónleika þar í byrjun mai. Einnig var sungið á Brúðkaupssýningu í Smáralindinni og um kvöldið var sungið á árshátið BYKO.


 

Léttsveitin í þættinum "Fólk"

Léttsveitin var í þættinum "Fólk" með Sirrý miðvikudaginn 19. mars. Ein Léttsveitarkvenna, Elínborg Jónsdóttir, eldaði frábæran rétt "svínakjöt með eplum" úr uppskriftabókinni okkar, og kórinn söng finnska tangóinn "Kukkani lumen alla" sem einnig er með íslenskum texta Margrétar Þorvaldsdóttur, formanns Léttsveitarinnar.


 

     

 

Vortónleikar

 Fljóð og funi

Vortónleikar Léttsveitarinnar voru haldnir í Austurbæ v/Snorrabraut laugardaginn 29. mars kl. 17.00 og 20.00 fyrir fullu húsi í bæði skiptin. Efnisskráin var funheit eins og nafnið ber með sér. Hljóðfæraleikarar auk Aðalheiðar Þorsteinsdóttur á píanó voru Tómas R. Einarsson á bassa, Wilma Young á fiðlu, finninn Matti Kallio á harmonikku auk þess sem hann söng finnskan tangó. Einsöngvari með okkur var hinn frábæri tenór Snorri Wiium. Stjórnandi var auðvitað Jóhanna V. Þórhallsdóttir. Tónleikarnir tókust með afbrigðum vel.

Efnisskrá tónleikana

Bréf frá Léttsveitarkonu 

Auglýsing í Birtu 28. mars 

Auglýsing í Magasin 27. mars 


 

Vestmannaeyjar

Fljóð og funi í Eyjum

Léttsveitin fór í tónleikaferð til Vestmannaeyja helgina 2.-4. maí. Sungið var í Höllinni í Vestmannaeyjum laugardaginn 3. maí kl. 16.00. Efnisskráin var fjölbreytt og skemmtileg, suðræn, seiðandi og funheit. Auk Jóhönnu stjórnanda og Aðalheiðar píanóleikara voru með okkur í för Tómas okkar Einarsson á bassa, finninn frábæri Matti Kallio á harmoniku og Léttsveitarkonan Stína bongó á slagverk. Tæplega 300 manns mættu á tónleikana og voru undirtektir Eyjamanna frábærar. Einnig var sungið á árshátíð Hressó.

Efnisskrá tónleikana 

 


Það er orðin föst hefð hjá Léttsveitarkonum að fara í útilegu ásamt fjölskyldum síðustu helgi júlímánðar. Hin árlega Léttsveitarútilega var í Galtalæk undir Brík helgina 25.-27. júlí. Ágætis mæting var og veðrið var ótrúlega gott, sól og blíða á meðan rigndi ótrúlegu magni af lágréttri rigningu allsstaðar annars staðar á landinu. Grillað var á laugardagskvöldinu og sungið og skemmt sér fram undir morgun.


Léttsveitin stofnaði gönguhóp sumarið 1997 og hefur frá þeim tíma gengið frá hinum ýmsu stöðum í Reykjavík á hverju sumri. Í sumar var ákveðið að hittast við Perluna öll þriðjudagskvöld kl. 20 og síðan gengið um Öskjuhlíðina og nágrenni. Sumargöngunni lauk svo með slútti og var það haldið 26. ágúst í Öskjuhlíðinni og var þar veglegur picknic að hætti Léttsveitarkvenna í blíðskaparveðri.


Haustönn hófst þriðjudaginn 9. september í húsi Fóstbræðra við Langholtsveg.

Léttsveitarkonur eru 112 talsins í upphafi haustannar.

 


Aðalfundur Léttsveitarinnar var haldinn þriðjudaginn 23. september í Fóstbræðraheimilinu. Margrét Þorvaldsdóttir, formaður, flutti skýrslu um starfsemi liðins árs, sem sjaldan hefur verið jafn margbreytileg. Gjaldkeri, María Björk Viðarsdóttir, kynnti ársskýrslu Léttsveitarinnar. Nokkrar lagabreytingar voru bornar undir fundinn og voru allar samþykktar samhljóða. Kosin var ný stjórn og sitja allar stjórnarkonur áfram nema gjaldkerinn, María Björk Viðarsdóttir, sem heldur nú á vit nýrra ævintýra í Þýskalandi. Í hennar stað kemur inn í stjórn Willa G. Möller. Maríu voru þökkuð vel unnin störf fyrir kórinn og risu kórkonur úr sætum og hylltu hana með miklu lófataki. Fundarstjóri var Sveinbjörg Sveinbjörnsdóttir og ritari Eygló Eiðsdóttir.

                       Stjórn Léttsveitarinnar 2003

                     Margrét Þorvaldsdóttir, 1. sópran, formaður
           Þórkatla Aðalsteinsdóttir, 1. sópran, varaformaður
                     Willa G. Möller, 1. alt, gjaldkeri 
            Védís Skarphéðinsdóttir, 2. alt, aðstoðargjaldkeri
          Ingibjörg Margrét Gunnlaugsdóttir, 2. sópran, ritari
           Stjórn Léttsveitarnnar 2003-2004 frá vinstri: Willa, Védís, Margrét, Þórkatla og Ingibjörg. 

 
 

Léttsveitin fór í æfingabúðir í Munaðarnesi helgina 17.-19. október. Góð þátttaka og allar skemmtu sér vel. Aldrei þessu vant var veðrið frábært og væsti ekki um nokkurn mann. Stutt æfing var á föstudagskvöldinu og siðan var æft frá 10-18 á laugardeginum. Um kvöldið var matur að hætti hússins og skemmtiatrið í anda Léttsveitarinnar. Veislustjóri var Hanna Halldórsdóttir og stóð hún sig með prýði.


Léttsveitin lét í október 2003 gera grillsvuntur með merki Léttsveitarinnar. Svunturnar voru í tveimur litum, svörtum og rauðum, með merkinu í silfri og gulli. Góðar við grillið og í eldhúsinu. Svunturnar voru til sölu hjá Léttsveitinni og kostuðu kr. 2.000.

 

 

 

 

 

 

Léttsveitin lét einnig gera fyrir sig kort sem voru upphaflega hugsuð sem jólakort en geta gengið allan ársins hring. Kortið prýðir vatnslitamynd eftir eina kórkvenna, Freyju Önundardóttur. Kortin voru til sölu hjá kórnum og kostuðu 10 stk. kr. 1.000.

 

 

 

 

Dekur og djamm

Dekur og djamm var haldið laugardaginn 8. nóvember í Fóstbræðraheimilinu til ágóða fyrir Ítalíuferðina sem til stendur í vor. Í þriðja sinn stóð kórinn fyrir alhliða skemmtun fyrir vinkonur sínar og stallsystur. Reist var glæsilegt hlaðborð drekkhlaðið léttsveitarkræsingum og barinn var opinn. Ýmis varningur var til sölu, jólakort, svuntur og matreiðslubækur kórsins, og allt milli himins og jarðar sem kórkonur höfðu föndrað eða áttu í fórum sínum. No name snyrtivörur voru með fulltrúa sína á staðnum sem förðuðu konur, Karlakórinn Þrestir kom í heimsókn, danskennarar drógu konur út á gólfið, Stína bongó og vinur hennar börðu trommur,4 klassískar léku á als oddi og Léttsveitin steig á svið. Allt var þetta mjög vel lukkað og ferðasjóður kórsins þyngdist og efldist til mikilla muna.


 

Jólatónleikar Bústaðakirkju

Léttsveitin hélt tvenna aðventutónleika í Bústaðakirkju fimmtudaginn 4. desember og þriðjudaginn 9. desember undir nafninu Af innlifun. Einsöngvari á tónleikunum var Anna Pálína Árnadóttir og söng hún eins og engill og vitað er að nokkrir tónleikagesta táruðust yfir söng hennar.  Auk Aðalheiðar Þorsteinsdóttur á píanó spilaði með okkur bassaleikarinn góðkunni Tómas R. Einarsson. Báðir tónleikarnir voru fyrir fullu húsi og tókust vel.

Efnisskrá tónleikana 


Léttsveitin lauk árinu með því að syngja í messu í Austurstræti á Þorláksmessu. Þetta er fjórða árið sem Léttsveitin syngur við þessa messu og þetta er því orðin fastur liður í jólaundirbúningnum. Því miður varð stjórnandinn okkar, Jóhanna, fyrir því óláni að fótbrotna nokkrum dögum fyrir Þorláksmessu, þannig að Aðalheiður stjórnaði okkur í hennar stað. Gekk söngurinn vel þó hvass væri úti og frekar kalt. Góður endir á frábæru ári.